Бүгүн олунньу 13 күнүгэр Модут орто оскуолатыгар Нам улууһун үөрэх эйгэтигэр үлэлии –хамныы сылдьар эдэр ыччатын икки ардыгар “Молодые лидеры профсоюза” күрэхтэһии буолан ааста. Күрэхтэһиини үөрэх үлэһиттэрин Улуустааҕы молодежнай совет уонна Нам улууһун үөрэх үлэһиттэрин идэлээх сойууһа тэрийэн ыыттылар. Дьүүллүүр сүбэннэн Нам улууһун дьиэ кэргэн уонна ыччат политикатын салайааччыта Екатерина Сергеевна Австафьева, Нам улууһун Движение первых хамсааһын салайааччыта Анна Ильинична Ядрихинская уонна Нам улууһун үөрэх үлэһиттэрин идэлээх сойууһун председателя Надежда Еремеевна Васильева үлэлээтилэр. Күрэхтэһии үөрүүлээх арыллыытын Егор Иннокентьевич Бочонин Нам улууһун үөрэх салалтатын аатыттан эдэрдэргэ эҕэрдэ тылын анаата.Күрэхтэһии сүрүн сыалынан буолар- эдэр ыччаттары өйөөһүн, сатабылларын көрүү уонна эдэр кадрдары бэлэмнээһин. Бу күрэхтэһиигэ уопсайа 8 хамаанда эрдэ сүүмэрдэнэн, бэлэмнэнии үлэтин саҕалаабыттара. Балаһыанньа быһыытынан күрэх 3 түһүмэхтэн турар: 1 түһүмэх –бэйэни билиһиннэрии, 2 түһүмэх – биир тэрээһини былааннаан, оҥорон кэлэн көмүскээһин, 3 түһүмэх – “Кини кимий?”. Күрэхтэһии бириэмэтигэр сүрдээх киирсиилэр буоллулар, ол курдук бэйэни билиһиннэриигэ эдэр ыччаттар аныгы искусственнай интеллегы толору баһылаабыттара көһүннэ. Онтон иккис түһүмэххэ биһиги улууспутугар туох, ханнык тэрээһин ыытыахха сөбүн кэпсээтилэр, элбэх санаа этиллиннэ, ол курдук квест, деловой оонньуу, форум, волонтерскай хамнааһын уо.д.а тэрээһиннэри, проектары толкуйдаан кэпсээтилэр, сүрүн темаларынан И.Е.Винокуров 130 сылыгар аналлаах тэрээһини дьүүллүүр сүбэ сэргии иһиттэ. Бүтэһик түһүмэххэ бүгүҥҥү күн “Ийэ тыл, сурук-бичик күнүгэр” сиэттэрэн ыытылынна, эдэр ыччаттарбыт Нам улууһун, Саха сирин, Россия, Аан дойдуга аатырбыт дьону таайан күрэхтэстилэр, бу күрэххэ биһиги ыччаттарбыт билиилэрэ-көрүүлэрэ киэҥин көрдөрдүлэр. Биһиги эдэр ыччаттарбытыгар бүгүҥҥү күн өрө көтөҕүллүүлээхтик ааһарыгар Улуустаа5ы молодежнай совет түмсүү кыттааччыларга “Музыкальное лото” ыыттылар уонна бэйэтин ырыаларын бэлэхтээтэ Invent ырыаһыт.

Уопсай түмүккэ “Сэттэ” хамаанда Абсолютный победитель буолан 40 000солк. сертификатынан наҕараадаланна, ити сууммаҕа бу сыл устата эдэр ыччаттарга былааннаабыт тэрээһинин ыытарга бэриллиннэ.

Приз зрительских симпатий анал аат хаһаайына буолла – Попов Виктор Евгеньевич, Хамаҕатта орто оскуолатын учуутала.

1 миэстэ тигистилэр “Биир ситим” хамаанда, 2 миэстэҕэ “Профактив” хамаанда, 3 миэстэҕэ Экипаж будущего хамаанда. Анал ааттар: “Креатив года” –Леди в черном, “Самая сплоченная команда”- Намстар, “Лучший старт” –Кэскил кыһата, “Знатоки” –УОТ.

Бүгүҥҥү күн Модут оскуолатыгар эдэр ыччат мустан, бэйэ-бэйэлэрин кытта билсиһэн, үөрэн-көтөн күрэх көхтөөхтүк ааста, бары даҕаны активнай позициялаах эдэр ыччат мустаннар санаа үллэстэн аастылар. Бу маннык тэрээһиннэр эдэр ыччаттары түмэр уонна инники үлэбитигэр төһүү күүс –көмө буолар. Нам улууһун үөрэх үлэһиттэрин идэлээх сойууһун аатыттан Модут орто оскуолатын директорыгар Иван Павловичка уонна коллективыгар күрэҕи ыытарга көмөҕүт иһин махталбытын тиэрдэбит.